Ligjëruesit

Prof. Serhat Aslan ka diplomuar në Fakultetin e Stomatologjisë të Universitetit Ege, ku më pas ka përfunduar doktoratën në Parodontologji pranë Institutit të Shkencave Shëndetësore të Universitetit Ege.

Fusha e tij është e fokusuar në parodontologji, protetikë fikse dhe implantologji, me theks të veçantë në mikrokirurgji, rikonstruktimin e indeve të forta dhe të buta, si dhe qasjet kirurgjike minimalisht invazive.

Prof. Aslan është Profesor vizitor në Universitetin e Milanos, Itali, dhe në KU Leuven, Belgjikë, si dhe Profesor i ftuar në Programin Postdiplomik të Parodontologjisë dhe Implantologjisë në Universitetin e Portos, Portugali.

Aktualisht, është Anëtar i Bordit Ekzekutiv dhe Sekretar i Përgjithshëm i Shoqatës Turke të Parodontologjisë. Prof. Aslan është gjithashtu aktiv në kërkime klinike në kirurgjinë plastike parodontale, rigjenerimin e drejtuar të kockës/indeve dhe terapinë estetike implantare.

Kirurgjia bashkëkohore rikonstruktive parodontale dhe peri-implantare synon të rikthejë funksionin dhe shëndetin biologjik, duke përmbushur njëkohësisht kërkesat estetike të pacientëve me stabilitet afatgjatë.

Kjo ligjëratë do të fokusohet në konceptet rikonstruktive minimalisht invazive për dhëmbët dhe implantet, me theks të veçantë në dizajnin e lambos, ruajtjen e vaskularizimit, menaxhimin e indeve të buta, stabilitetin e plagës dhe strategjitë bashkëkohore për rikonstruktimin e indeve të forta dhe të buta. Do të diskutohen qasjet e bazuara në evidencë dhe perspektivat e reja kirurgjike për optimizimin e rezultateve klinike dhe reduktimin e komplikimeve në terapinë parodontale dhe peri-implantare.

Profesor Ayoub ka diplomuar në Fakultetin e Stomatologjisë të Universitetit të Aleksandrisë dhe ka përfunduar studimet pasuniversitare dhe masterin në Implantologji Orale në Universitetin e Seviljes, Spanjë. Ai është Konsulent në Implantologjinë Orale, si dhe themelues dhe president i Shoqatës Egjiptiane të Implantologjisë Orale.

Përvoja dhe praktika e tij klinike është e fokusuar ekskluzivisht në implantologjinë dentare, implantet kompresive me interes të veçantë në vendosjen e implanteve minimalisht invazive, ngarkimin e menjëhershëm, menaxhimin e indeve të buta.

Dr. Ayoub është autor i librave Fundamentals of Implant Dentistry dhe Art of Simplicity in One Piece Implant, si dhe shumë artikujve shkencorë në implantologji. Ai është ligjërues në kongrese kombëtare dhe ndërkombëtare në Evropë, Lindjen e Mesme dhe Egjipt. Që nga viti 2006, ka udhëhequr kurse dhe trajnime klinike në implantologji.

Implantet kompresive ofrojnë stabilitet të lartë primar dhe mundësi për ngarkim të menjëhershëm, por suksesi i tyre varet nga kontrolli i saktë biomekanik dhe vlerësimi klinik. Kjo ligjëratë shqyrton koncepte kritike, si aplikimi i tepërt i forcës rrotulluese, fraktura e implantit, lidhja dhe stabilizimi intraoral i implanteve dhe menaxhimi i kreshtave të ngushta, duke u mbështetur në rastet klinike si dhe duke analizuar dështimet në implantologji.

E orientuar drejt procesit të vendimmarrjes klinike, më shumë sesa ndaj zbatimit strikt të protokoleve, kjo ligjëratë analizon kriteret që përcaktojnë vazhdimin e trajtimit, modifikimin e qasjes terapeutike ose ndërprerjen e ndërhyrjes. Në këtë kontekst, theksohet se, në implantologji përvoja klinike përbën një faktor përcaktues për prognozën dhe suksesin e rezultateve terapeutike klinike.

Dr. Giuseppe Perinetti ka diplomuar në Stomatologji në Universitetin e Chietit, Itali. Më pas ka përfunduar doktoratën në Shkencat e Jetës në Open University, Mbretëria e Bashkuar, si dhe studimet master në Ortodonci në Universitetin e Triestes, Itali.

Dr. Perinetti është fitues i “Çmimit Kombëtar” nga Shoqata Italiane e Ortodontëve dhe i “Çmimit të Ortodoncisë” nga Shoqata Kroate e Ortodoncisë. Ai është editor i asociuar në European Journal of Orthodontics dhe Dentofacial Research.

Ka publikuar mbi 120 artikuj shkencorë, kryesisht në revista ndërkombëtare stomatologjike dhe biologjike. Sipas bazës së të dhënave Scopus, ka një indeks citimi H-index 38. Në vitin 2022, në vlerësimin ndërkombëtar Expertise in Malocclusion Worldwide, është renditur i dhjeti në botë.

Ankorimi palatinal paraqet një alternativë bashkëkohore ndaj metodave klasike të ankorimit ortodontik, duke mundësuar kontroll më të mirë biomekanik dhe menaxhim më të parashikueshëm të rasteve komplekse. Kjo ligjëratë do të trajtojë përparësitë e ankorimit palatinal, zonat e përshtatshme të vendosjes dhe rëndësinë e planifikimit para ndërhyrjes.

Vëmendje e veçantë do t’i kushtohet përdorimit të ankorimit palatinal në rastet e distalizimit dhe mezializimit, në trajtimet me ekstraksione, në tërheqjen e kaninëve të inkluduar, në zgjerimin maksilar dhe në menaxhimin e rasteve të klasës së tretë skeletike. Gjithashtu, do të prezantohen planifikimi, digjitalizimi i procedurave, gabimet më të zakonshme dhe vështirësitë e mundshme klinike.

Dr. Fisnik Kasapi ka diplomuar në Fakultetin e Stomatologjisë të Universitetit “Shën Kirili dhe Metodi” në Shkup, ku ka përfunduar specializimin në Kirurgji Orale dhe studimet master në Stomatologji, dhe aktualisht është doktorant në Universitetin Jaume I në Castellón de la Plana, Spanjë.

Veprimtaria e tij profesionale është e fokusuar në kirurgjinë orale, implantologji dhe augmentimin kockor. Që nga viti 1998, është pronar dhe drejtor i Klinikës Dentare “Dentin” si dhe aktualisht vazhdon si profesor vizitor në programin Master në Shkencat Dentare në Universitetin Jaume I në Spanjë.

Dr. Kasapi ka mbajtur pozita të rëndësishme drejtuese në organizata profesionale kombëtare dhe ndërkombëtare. Ai ka qenë anëtar i Bordit Ekzekutiv të Odës Stomatologjike të Maqedonisë, është kryetar i Shoqatës Shqiptare të Implantologjisë në Maqedoni – AIAM dhe anëtar i Komitetit Evropian të BDIZ EDI, kryetar i EDI Maqedoni, ndërsa që nga viti 2023, është kryetar i Shoqatës së Stomatologëve Shqiptarë të Maqedonisë – Apolonia.

Implantet dypjesëshe kanë luajtur një rol themelor në zhvillimine implantologjisë moderne. Megjithatë, çdo pikë lidhëse përfaqëson njëkohësisht edhe një zonë potenciale dobësie — një mikroboshllëk ku mund të grumbullohen bakteret, të ndodhë resorbimi kockor dhe të shfaqen komplikime biologjike e mekanike.

Implantet njëpjesëshe e eliminojnë plotësisht këtë problematikë. Mungesa e lidhjes implant–abutment, e mikrolëvizjeve dhe e mikroboshllëkut mundëson një përgjigje më të favorshme të indeve të buta, ruajtje më të mirë të kockës krestale dhe njërrjedhë restauruese më të thjeshtë dhe më të drejtpërdrejtë.

Kjo ligjëratë vë në diskutim supozimin se kompleksiteti i protokolleve All-on-X përbën gjithmonë zgjidhjen optimale. Përmes rasteve klinike dhe të dhënave mbi rezultatet, do të analizohen situatat në të cilat implantet njëpjesëshe PROVO S jo vetëm që arrijnë rezultate të krahasueshme me implantet dypjesëshe, por në raste të caktuara mund t’i tejkalojnë ato.

Dr. Gazmend Jusufi ka diplomuar në Fakultetin e Stomatologjisëtë Universitetit “Shën Kirili dhe Metodi” në Shkup, ku ka përfunduar edhe specializimin dhe doktoratën në Ortodonci. Tema e doktoratës së tij është fokusuar në ndryshimet e pështymës gjatë përdorimit të dy materialeve të ndryshme përngjitjen e breketave ortodontike.

Nga viti 2011 deri në vitin 2024 ka punuar si ortodont në Klinikën Universitare të Stomatologjisë “Shën Pantelejmon” në Shkup. Gjatë viteve 2020–2022 ka qenë docent në Kolegjin Universum në Kosovë.

Që nga viti 2022, Dr. Jusufi është docent në Fakultetin e Stomatologjisë të Universitetit Ndërkombëtar Ballkanik në Shkup, Maqedoni e Veriut. Veprimtaria e tij akademike dhe klinike është e fokusuar në diagnostikimin dhe trajtimin e anomalive ortodontike.

Trajtimi ortodontik synon korrigjimin e anomalive dentare dhe skeletore, duke përmirësuar funksionin, estetikën dhe stabilitetin afatgjatë të okluzionit. Në raste të caktuara, ekstraksioni dentar paraqet një alternativë terapeutike për krijimin e hapësirës, harmonizimin e harkut dentar dhe arritjen e rezultateve optimale.

Kjo ligjëratë do të trajtojë indikacionet, kundërindikacionet, përparësitë dhe kufizimet e ekstraksioneve në rastet me grumbullim të theksuar dentar, protruzion dentoalveolar, malokluzione të klasës II dhe III dhe asimetri dentare. Vëmendjee veçantë do t’i kushtohet përzgjedhjes së pacientëve, ndikimit në profilin facial dhe funksionin okluzal, si dhe planifikimit individual të bazuar në evidencë për arritjen e rezultateve funksionale, estetike dhe të qëndrueshme.

Dr. Olja Tanellari ka diplomuar në Fakultetin e Mjekësisë Dentare të Universitetit të Mjekësisë dhe Farmacisë “Grigore T. Popa” në Iaşi, Rumani, ku ka përfunduar edhe specializimin në Ortodonci dhe Ortopedi Dentofaciale. Në vitin 2024 ka fituar gradën Doktor i Shkencave në Ortodonci pranë të njëjtit universitet.

Që nga viti 2013 është lektore e Ortodoncisë në Universitetin Aldent, ku aktualisht është edhe Koordinatore e Programit të Specializimit Afatgjatë në Ortodonci. Paralelisht, ushtron veprimtarinë klinike si specialiste në Ortodonci dhe Ortopedi Dentofaciale në Klinikën Orto Life në Tiranë.

Nga viti 2014 deri në vitin 2022 ka shërbyer si Sekretare e Përgjithshme e Shoqatës së Ortodontëve Shqiptarë. Është anëtare e Shoqatës Ballkanike të Specialistëve Ortodontë, Federatës Evropiane të Ortodoncisë dhe Shoqatës Rumune të Ortodontëve, ndërsa veprimtaria e saj shkencore fokusohet në ortodonci, ortopedi dentofaciale dhe kërkime klinike.

Ortodoncia bashkëkohore tejkalon aplikimin standard të braketeve dhe kërkon diagnostikim të thelluar, planifikim të individualizuar dhe bashkëpunim të strukturuar multidisiplinar, veçanërisht në rastet me nevoja komplekse estetike dhe funksionale.

Përmes rasteve klinike, kjo ligjëratë do të paraqesë hartimin dhe zbatimin e planeve terapeutike të integruara, të përshtatura sipas ecurisë klinike të secilit pacient. Do të theksohet roli i qasjes multidisiplinare në përmirësimin e rezultateve funksionale dhe estetike, reduktimin e komplikimeve dhe arritjen e stabilitetit afatgjatë të trajtimit ortodontik.

Dr. Almiro Gurakuqi ka diplomuar në Degën e Stomatologjisë pranë Fakultetit të Mjekësisë, Universiteti i Tiranës, ndërsa formimin pasuniversitar e ka orientuar në fushën e implantologjisë dhe protetikës mbi implante. Ka përfunduar Master në Implantologji, Master Universitar të Nivelit II në “Implantologji dhe Protezim Dentar”, specializim afatgjatë në Implantologji, ndërsa në vitin 2015 ka fituar gradën Doktor i Shkencave në Stomatologji.

Që nga viti 1998 ushtron veprimtarinë klinike pranë Klinikës Dentare Toti & Gurakuqi në Tiranë. Ka ndjekur trajnime të shumta të avancuara ndërkombëtare në implantologji, kirurgji implantare, protetikë dhe estetikë dentare. Është autor dhe bashkautor i shumë punimeve shkencore dhe i mbi 60 prezantimeve në aktivitete shkencore kombëtare dhe ndërkombëtare.

Ka një përvojë të gjatë akademike si lektor në fushën e implanto-protezimit dhe aktualisht është lektor pranë Aldent University. Prej prillit 2025 është President i Urdhrit të Stomatologut të Shqipërisë.

Koncepti “All-on-4” është një nga qasjet më të rëndësishme të implantologjisë moderne për rehabilitimin fiks të pacientëve edentulë ose me denticion terminal. Megjithatë, aplikimi i tij kërkon përzgjedhje të kujdesshme të pacientit, planifikim të saktë kirurgjikal dhe protetik, si dhe respektim të indikacioneve biologjike dhe funksionale.

Përmes evidencës shkencore bashkëkohore dhe rasteve klinike nga përvoja e tij shumëvjeçare, ligjërata do të trajtojë indikacionet, kufizimet dhe komplikacionet e konceptit “All-on-4”, duke ngritur një pyetje thelbësore për praktikën klinike: kur është kjo qasje zgjedhja e duhur dhe kur duhet të konsiderohen alternativa më konservative?

Dr. Sc. Mirlinda Sopi Krasniqi ka përfunduar studimet në Stomatologji në Fakultetin e Mjekësisë të Universitetit të Prishtinës, specializimin në Parodontologji dhe Mjekësi Orale, ndërsa në vitin 2022 ka fituar gradën Doktor i Shkencave të Stomatologjisë. Fusha e saj profesionale dhe kërkimore përfshin parodontologjinë, kirurgjinë parodontale, rigjenerimin e indeve të forta dhe të buta, terapinë laserike dhe patologjitë orale.

Aktualisht është staf akademik në Universitetin e Prishtinës dhe Shefe e Klinikës së Parodontologjisë dhe Mjekësisë Orale në Qendrën Klinike Stomatologjike Universitare të Kosovës.

Lezionet endo-parodontale përbëjnë një sfidë të rëndësishme diagnostike dhe terapeutike për shkak të ndërlidhjes anatomike, biologjike dhe mikrobiologjike ndërmjet pulpës dentare dhe indeve periodontale.

Kjo ligjëratë do të fokusohet në diagnostikimin diferencial dhe menaxhimin bashkëkohor të lezioneve endo-parodontale, me theks në interpretimin e gjetjeve klinike dhe radiografike, përcaktimin e protokollit optimal terapeutik dhe integrimin e terapive endodontike, parodontale dhe rigjenerative. Përmes evidencës shkencore dhe rasteve klinike do të diskutohen strategjitë që synojnë kontrollin e infeksionit, ruajtjen afatgjatë të dhëmbit natyral dhe optimizimin e prognozës klinike.

Prof. Asoc. Dr. Andis Qendro është kirurg oro-maksilofacial dhe pedagog me përvojë të gjatë akademike dhe klinike. Ka përfunduar specializimin afatgjatë në Kirurgji Oro-Maksilofaciale, Masterin Shkencor në Kirurgji Orale dhe ka fituar gradën Doktor i Shkencave Mjekësore në Kirurgji Oro-Maksilofaciale. Në vitin 2026 ka fituar titullin Profesor i Asociuar.

Që nga viti 2002 ushtron veprimtarinë si kirurg oro-maksilofacial pranë Qendrës Spitalore Universitare “Nënë Tereza” në Tiranë, ndërsa prej vitit 2016 është Shef i Shërbimit të Kirurgjisë Oro-Maksilofaciale. Paralelisht, që nga viti 2000 është lektor i Kirurgjisë Oro-Maksilofaciale në Fakultetin e Mjekësisë Dentare, Universiteti i Mjekësisë, Tiranë, ku aktualisht drejton edhe Njësinë Bazë të Departamentit të Kirurgjisë OMF dhe Paraklinike.

Formimin profesional e ka pasuruar me trajnime klinike ndërkombëtare në kirurgji maksilofaciale, kirurgji rikonstruktive plastike, kirurgji orale dhe implantologji, në institucione universitare në Gjermani, Irlandë, Itali dhe Mbretërinë e Bashkuar. Është autor dhe bashkautor i një numri publikimesh shkencore dhe pjesëmarrës e ligjërues në kongrese dhe konferenca kombëtare e ndërkombëtare, me fokus të veçantë në kirurgjinë oro-maksilofaciale, implantologjinë dhe kirurgjinë e udhëzuar.

Immediate Loading – Avantazhet e sistemit implantar AnyRidge të kompanisë MegaGen, me fokus në stabilitetin primar, aplikimin klinik dhe rezultatet afatgjata.

Dr. Spec. Kreshnik Syka ka përfunduar studimet në Stomatologji në Fakultetin e Mjekësisë të Universitetit të Prishtinës, ndërsa Specializimin në Kirurgji Orale e ka përfunduar në vitin 2010. Veprimtaria e tij profesionale është e fokusuar në kirurgjinë orale dhe implantologjike, me theks të veçantë në kirurgjinë rigjenerative të indeve të forta dhe të buta, si dhe në menaxhimin e rasteve komplekse implantologjike.

Aktualisht ushtron veprimtarinë profesionale në Prishtinë dhe zhvillon bashkëpunim të vazhdueshëm me profesionistë të fushës në Kosovë. Është autor i publikimeve shkencore dhe pjesëmarrës aktiv në konferenca profesionale kombëtare dhe ndërkombëtare. Dr. Syka është gjithashtu trajner i certifikuar nga kompania Meisinger në fushën e rigjenerimit kockor.

Prof. Ass. Dr. Burim Kiseri ka diplomuar në Fakultetin e Stomatologjisë të Universitetit të Stambollit, ku ka përfunduar specializimin dhe doktoratën (PhD) në Protetikë Dentare.

Veprimtaria e tij akademike dhe klinike është e fokusuar në protetikën dentare, stomatologjinë estetike, okluzionin dhe çrregullimet temporomandibulare, si dhe në aplikimin e teknologjive digjitale dhe inteligjencës artificiale në stomatologji.

Ka qenë i angazhuar në Departamentin e Protetikës të Universitetit të Stambollit, ndërsa aktualisht është Profesor Asistent në Fakultetin e Stomatologjisë të UBT-së në Prishtinë, ku gjatë viteve 2020–2023 ka ushtruar edhe funksionin e Dekanit. Është autor dhe bashkautor i një numri të konsiderueshëm publikimesh shkencore dhe pjesëmarrës aktiv në konferenca kombëtare dhe ndërkombëtare.

Stomatologjia estetike bashkëkohore po zhvendoset nga aplikimi i standardeve universale drejt krijimit të buzëqeshjeve të individualizuara, të harmonizuara me karakteristikat faciale, funksionale dhe pritshmëritë e pacientit.

Kjo ligjëratë do të trajtojë rolin e perceptimit estetik, analizës faciale, dizajnit të buzëqeshjes, mock-up-it dhe planifikimit digjital në trajtimet me faseta dentare. Theks i veçantë do t’i kushtohet qasjeve minimalisht invazive, komunikimit me pacientin dhe integrimit të parametrave biologjikë, funksionalë dhe estetikë, me synim arritjen e rezultateve natyrale, të personalizuara dhe afatgjata.

Prof. Ass. Dr. Donika Bajrami-Shabani ka diplomuar në Degën e Stomatologjisë të Fakultetit të Mjekësisë, Universiteti i Prishtinës, ku ka përfunduar specializimin në Sëmundjet e Dhëmbit me Endodoncion dhe ka fituar gradën Doktor i Shkencave Stomatologjike. Fusha e saj akademike dhe kërkimore është e fokusuar në endodonci, me theks të veçantë në efikasitetin antimikrobik dhe citotoksik të irriguesve dhe medikamenteve endodontike.

Aktualisht është Profesor Asistent në Universitetin e Prishtinës dhe specialiste në Klinikën e Sëmundjeve të Dhëmbit me Endodoncion në QKSUK. Është autore dhe bashkautore e një numri publikimesh shkencore dhe pjesëmarrëse aktive në konferenca kombëtare dhe ndërkombëtare. Ka qenë Kryetare e Shoqatës së Stomatologëve të Kosovës, ndërsa aktualisht është Nënkryetare e Odës së Stomatologëve të Kosovës.

Lezionet endo-parodontale përbëjnë një sfidë të rëndësishme diagnostike dhe terapeutike për shkak të ndërlidhjes anatomike, biologjike dhe mikrobiologjike ndërmjet pulpës dentare dhe indeve periodontale.

Kjo ligjëratë do të fokusohet në diagnostikimin diferencial dhe menaxhimin bashkëkohor të lezioneve endo-parodontale, me theks në interpretimin e gjetjeve klinike dhe radiografike, përcaktimin e protokollit optimal terapeutik dhe integrimin e terapive endodontike, parodontale dhe rigjenerative. Përmes evidencës shkencore dhe rasteve klinike do të diskutohen strategjitë që synojnë kontrollin e infeksionit, ruajtjen afatgjatë të dhëmbit natyral dhe optimizimin e prognozës klinike.

Dr. Vikas Gowd ka përfunduar studimet M.D.S. në Protetikë Stomatologjike në A.B. Shetty Memorial Institute of Dental Sciences, Mangalore, Indi. Aktualisht është Drejtor Menaxhues, implantolog kryesor dhe specialist i protetikës në Dr. Gowd’s Dental Hospital.

Veprimtaria e tij klinike është e fokusuar në implantologji, protetikë implantare, stomatologji estetike dhe rehabilitime komplekse orale.

Dr. Gowd është themelues dhe president i School of Dental Implants, anëtar i International Congress of Oral Implantologists dhe në vitin 2025 është vlerësuar me çmimin FAMDENT Outstanding Dentist of the Year.

Vendosja dhe ngarkimi i menjëhershëm i implanteve kanë avancuar ndjeshëm implantologjinë bashkëkohore, duke mundësuar shkurtimin e kohës së trajtimit, ruajtjen e arkitekturës së indeve të forta dhe të buta dhe përmirësimin e rezultateve funksionale, estetike dhe të kënaqësisë së pacientit. Megjithatë, parashikueshmëria klinike e këtyre procedurave varet nga përzgjedhja e kujdesshme e rasteve, planifikimi i saktë implantoprotetik, realizimi preciz kirurgjik dhe respektimi i parimeve biomekanike dhe restauruese.

Kjo ligjëratë përmbledh mbi një dekadë përvojë klinike dhe kërkimore në vendosjen dhe ngarkimin e menjëhershëm të implanteve në zonën estetike anteriore, regjionet posteriore dhe rehabilitimet e plota implantoprotetike. Do të trajtohen stabiliteti primar, menaxhimi i indeve të buta, minimizimi i komplikimeve dhe rezultatet afatgjata, përfshirë protokollin e patentuar për ekstraksionin, vendosjen dhe ngarkimin e menjëhershëm të implanteve në regjionet posteriore të maksilës dhe mandibulës.

Dr. Arsim Thaqi ka përfunduar studimet në Mjekësi në Medical University Graz, Austri, ku në vitin 2005 ka përfunduar edhe doktoraturën me temë mbi faktorët gjenetikë të rrezikut për mikroangiopatinë cerebrale. Gjatë formimit akademik ka qenë hulumtues në Institutin e Biokimisë dhe Biologjisë Molekulare dhe asistent shkencor në Klinikën Universitare të Neurologjisë në Graz.

Është specialist i Otorinolaringologjisë dhe Kirurgjisë së Kokës dhe Qafës, si dhe i Mjekësisë së Gjumit. Përvojën profesionale e ka zhvilluar në institucione klinike në Gjermani dhe Austri, ndërsa gjatë viteve 2014–2017 ka ushtruar detyrën e zëvendësdrejtorit në Departamentin e ORL-së dhe Kirurgjisë së Kokës dhe Qafës në Schwarzwald-Baar Klinikum, Gjermani. Nga viti 2018 është themelues i Kosova Sinus Center në Prishtinë dhe anëtar i Sinus Academy Berlin.

Apnea obstruktive e gjumit karakterizohet nga episode të përsëritura të obstruksionit të rrugëve të sipërme të frymëmarrjes gjatë gjumit, duke shkaktuar ndërprerje të frymëmarrjes, hipoksi dhe pasoja të rëndësishme funksionale dhe sistemike.

Ligjërata do të trajtojë rolin e Drug-Induced Sleep Endoscopy (DISE) si metodë diagnostike për vlerësimin dinamik të rrugëve të sipërme të frymëmarrjes dhe identifikimin e mekanizmit të obstruksionit. Fokus i veçantë do t’i kushtohet përdorimit të DISE në përzgjedhjen e trajtimit individual, veçanërisht para ndërhyrjeve kirurgjikale ose aplikimit të aparateve orale si alternativë ndaj terapisë CPAP. Do të trajtohen gjithashtu parimet e sedacionit të kontrolluar dhe monitorimit gjatë procedurës.